ياشعر .. ويش اللي تبي // هات الجواب من الاخير
مليت جلسة مكتبي // كراستي وحبر الضمير
ومليت حكيٍ مختبي // خلف الشفايف مستجير
انزف هجوسي وتعبي // من شوفة الوضع المرير
اللعب صار فـ ملعبي // ولابه معين ولا نصير
كم الزمن هذا غبي // كم الزمن هذا حقير
ياكل بلدنا الاجنبي // وابن البلد عايش فقير
يا أُمة الضاد إشربي // من منهل الذل الوفير
غني ! وهزّي ! واطربي ! // قولي لنا الدنيا بخير
يفنى وطن .. يحيا صبي // يسبق حروف اسمه ( أمير )
منطق ينافي مذهبي // لوكنت دايم مستخير
ناسٍ معشاها ظبي // وترقد على سلك الحرير
وناسٍ ورا الخبز تحبي // تاكل من الجوع الشعير
يا شلة الـ ( حكـــم ) إكتبي // بالعار وش معنى أجير
وش معنى ذل اليعربي // وإسلامنا يزحف كسير
واحصي الموارد وانهبي // وحنا لنا صبر البعيـر
وإجني من النخل رطبي // واعطيه تاجر أو وزير
وضع الدويلات يهبي // وثروه .. لـِ أُسـره ؟؟ مايصير !!
الله من يومٍ يبي // يآآآتي .. وشـره مستطير
مافيه شيٍ يختبي // وننظر صحايفنا تطير
زمره على حوض النبي // وزمره فـ نار وزمهـريـر
تمت وغاية مطلبي // نمشي على هديٍ منير
*
*
*
